शरद पवार गटाला मोठा धक्का, गुलाबराव देवकर अजित पवार गटात जाणार?

NewsZenn Dec 7, 2024 227 0

जळगाव: महाराष्ट्रातील राजकीय घडामोडींना गती मिळाली असून, राज्यातील प्रमुख नेत्यांच्या हालचालींनी चर्चांना उधाण आले आहे. राष्ट्रवादी काँग्रेस पक्षात पुन्हा एकदा फूट पडण्याची शक्यता वर्तवली जात आहे. जळगावचे माजी पालकमंत्री गुलाबराव देवकर यांनी शरद पवार गट सोडून अजित पवार गटात जाण्याचा निर्णय घेतल्याची माहिती समोर येत आहे.

गुलाबराव देवकर यांनी नुकतीच अजित पवार गटाचे प्रदेशाध्यक्ष सुनील तटकरे यांची भेट घेतली. या भेटीनंतर राजकीय वर्तुळात खळबळ उडाली असून, देवकर लवकरच शरद पवार गटाची साथ सोडतील, अशी चर्चा सुरू झाली आहे. देवकर यांच्या या संभाव्य निर्णयामुळे आगामी स्थानिक स्वराज्य संस्थांच्या निवडणुकांपूर्वी शरद पवार गटाला मोठा धक्का बसणार आहे.

महायुती सरकारच्या अधिवेशनाची पार्श्वभूमी:
राज्यात महायुती सरकार सत्तेवर आल्यानंतर विधानसभेचे विशेष अधिवेशन सुरू आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांनी 5 डिसेंबर रोजी शपथ घेतली. तीन दिवस चालणाऱ्या या अधिवेशनात नवनिर्वाचित आमदारांचा शपथविधी व विधानसभा अध्यक्षांची निवड होणार आहे.

या पार्श्वभूमीवर, गुलाबराव देवकर यांच्या निर्णयामुळे शरद पवार गटाची ताकद कमी होण्याची शक्यता आहे, तर उत्तर महाराष्ट्रात अजित पवार गटाची पकड वाढण्याची शक्यता राजकीय विश्लेषक वर्तवत आहेत.